मलाला उलुलुलु

मी - मलाला उलुलुलु

दाढीवाला - नवीन उच्चार जमताहेत बघ पिल्लू ला, वेगवेगळे आवाज काढतोय रोज

मी - मलाला उलुलुलु

पप्पी घेणारी बाई - किती छान ना, बाळाच्या भाषेला कुणी डिकोड करू शकले तर ते काय गमतीजमती सांगताहेत ते कळेल आपल्याला नै

मी - मलाला उलुलुलु (अरे मला उचलून घ्या, कंटाळा आलाय लोळायचा!)

कन्फ्युजन......

बाबा - गुच्चू, झिंटू, पुट्टू, माझं पिल्लु, गुज्जुबज्जू, मुंटा पिंटा, कुट्टू, मुंडा, झुंडूमुंडू, अरे माझ्या मुला गुलाबाच्या फुला..

आई - गुंडू, बबलू, बबुडी, बच्चू, पिल्लू, शोनू, छुनकु, बबलडू, गुड्डू, हुश्शू, माऊ, छावा, नोनू, चिंटू, टिंकुडी, अनिमनिछोनी..

मी - माझं नाव नक्की काय आहे?

🤔

बचाव बचाव

आमच्या घरात दोन डेंजर लोक राहतात, येता जाता माझ्या पप्प्या घेत असतात, गालावर, हातावर, पायावर, डोक्यावर..
.
मी सॉलिड चक्रावलो की आता कसं रोखू या लोकांना.. आय मीन, ते वेळेवर दूध देतात, झोपवतात, गाणी वगैरे पण म्हणतात, पण दोघेही पप्प्या फार घेतात राव..
.
मग एक आयडिया केली, हळूच वळून पालथा झोपलो, म्हटलं आता यांना काही करता येणार नाही.. तर "अय्या किती छान वळले माझे पिल्लू.." असं म्हणत माझ्या  फूड सप्लायर बाईंनी माझ्या पाठीच्या ढीगभर पप्प्या घेतल्या..
.
शप्पथ! काहीही प्रायव्हसी नाहीये ओ मला..

😁😘🤣

बाबांचा अंदाज

दाढीवाला (बाबा)- भरपूर दूध प्यायला आहे बच्चू, आता 4 तास तरी झोपेल बघ हा

फूड सप्लायर (आई)- होय, आपण पण झोपून घेऊ आता निवांत

मी - (पलीकडे गादीवरुन एक डोळा किलकिला करून बघत) हे दोघे गाढ झोपले रे झोपले की मी लग्गेच जोरात ओरडणार आहे दुदू पाहिजे म्हणून.. हीहीही..

🙄😁

कुणाच्या कुशीत झोपू बरं..

काल संध्याकाळी घरातल्या दोन लोकांची मला झोपवताना काहीतरी खुसुरफुसुर सुरू होती, दोघे एकमेकांचे हात ढकलत होते. मी जरा टेन्स झालो हं, म्हटलं हा काय हिंसाचार सुरुय..
.
शेवटी तो दाढीवाला म्हणाला, नऊ महिने होता ना तुझ्या खूप जवळ, आता कधी कधी माझ्याजवळ पण पाहिजे ना.. माझ्याच कुशीत झोपणार आज आपलं पिल्लू! उद्या तुझ्याकडे..
.
माझ्या प्रेमात वेडे झालेत माझे आई बाबा 💕

डायपर आणि कर्तव्य

डायपर हे त्वचेला कोरडे ठेवण्यासाठी असते, त्याच्या या प्रेमळ कर्तव्याची चाड ठेवून मी पण मग त्याला कोरडे ठेवतो, उगाच सुसू करून डायपर ओले करू नये, बाप्पा पाप देतो.
.
सुसू ही नेहमी आईच्या अंगावरच करावी, विशेषतः ती अंघोळ करून छान कपडे घालून आल्यावर..

आईची मज्जा

रात्री अन् दिवसाही दर दोन तासांनी उठून दूध पिणे कार्यक्रम करतो मी, आणि माझ्यामागे धावताना आईची (आमच्या फूड सप्लायर कर्मचारी) सॉलिड मज्जा येते.. हीहीही..

पण या नादात कधी कधी ती सकाळी दात घासायचे विसरतेय, हे तिला सांगू की नको?

माझ्या सेवेत खंड तर पडणार नाही ना?

👶

ओळख पाळख जराशी..

नमस्ते सगळ्यांना! मी अनिर्वाण, शार्दुली आणि सुधीर डिगे यांचा पिल्लू बच्चा.. सध्या मी खूपच चिंटूकला आहे, म्हणून माझी आई माझ्यासाठी लिहितेय. मी मोठा झालो की मग मी स्वतः लिहीन हं 👶😊